A representación do grupo municipal do Bloque Nacionalista Galego, nos concellos do Ribeiro, presenta a seguinte MOCIÓN sobre o decreto de bacharelato para ser debatida no seo da corporación.
EXPOSICIÓN DE MOTIVOS
A implantación en Galiza dos distintos currículos das ensinanzas non universitarias en aplicación da LOE (Lei Orgánica de Educación) están producindo graves problemas á hora de estabelecer un ensino equilibrado e adaptado á realidade galega que promova a formación integral do alumnado.
A LOE e a posterior normativa dictada polo Goberno central, ao igual que o fixeron as anteriores leis da etapa do PP, impoñen un sistema educativo centralizador que fixa unha elevada porcentaxe de contidos mínimos, novas áreas do currículo e o ensino da relixión dentro do horario lectivo e con valor académico. Todas estas cuestións impiden avanzar cara a un ensino laico; que Galiza poida exercer as competencias propias, e que o sistema educativo e o currículo se axeite á nosa realidade e ás necesidades do alumnado galego.
No que respecta ao bacharelato a Consellaría de Educación e Ordenación Universitaria elaborou un borrador de decreto sobre o currículo desta etapa educativa que supón a redución do horario lectivo en tres áreas fundamentais, a Educación Física que queda reducida a unha hora semanal nun só curso, a Filosofía (que pasa de tres a dúas horas) e tamén unha hora menos para Historia (de catro a tres horas).
As áreas obxecto de redución implican consecuencias negativas moi importantes na formación do alumnado.
En primeiro lugar a redución na área de Educación Física supoñería a práctica desaparición desta materia pois unha hora en toda a etapa outórgalle un carácter residual, tería menos carga horaria que Relixión e colocaría a Galiza moi lonxe dos estándares dos sistemas de ensino máis avanzados. A maiores iría en contra das propias recomendacións de distintos organismos internacionais.
A redución na área de Filosofía, considerando que se incrementan os contidos a impartir (Cidadanía), e en Historia vai impedir que os contidos poidan ser impartidos desde unha perspectiva propia galega, o que se traduce en que os currículos das materias impartidas en Galiza se van reducir exclusivamente aos mínimos marcados a nivel de Estado.
O borrador de Decreto está en fase de discusión para a súa posterior aprobación polo que aínda hai tempo para que, atendendo ás demandas de moitos sectores educativos, se produzan as necesarias modificacións que garantan unha carga lectiva adecuada para o coñecemento da realidade galega e unha formación equilibrada e integral do alumando.
1º Instar á administración educativa do Goberno central a que nas leis educativas e demais normativa que as desenvolve respecte as competencias educativas propias de Galiza de xeito que permita o estabelecemento de currículos equilibrados e adaptados á realidade galega.
2º Instar ás administracións educativas central e galega a avanzar cara un ensino laico no que a materia de relixión non forme parte do currículo.
3º Demandar da administración educativa galega a apertura dun proceso de diálogo co sector e que o novo decreto de bacharelato.
- garanta, como mínimo, a actual carga horaria nas materias de Educación Física, Filosofía e Historia,
- asegure a presenza da Historia e Xeografía de Galiza, a Literatura Galega do Século XX, a Música e a Educación Física como materias optativas de oferta obrigatoria.
- estabeleza o ensino da relixión fóra do horario lectivo dos centros.
